मुंबई : ग्रामविकास आणि महिला-बालकल्याण मंत्री पंकजा मुंडे यांनी नुकतीच वित्त व नियोजन विभागाची प्रलंबित विषयांवर बैठक घेतली. या वेळी वित्त व नियोजन विभागाकडे प्रलंबित असलेल्या माझी कन्या भाग्यश्री, स्मार्ट अंगणवाडी, सुधारित मनोधैर्य योजना आदी योजना, तसेच ग्रामविकास विभागाच्या विविध योजना तात्काळ मंजूर करण्याचे आदेश मुंडे यांनी दिले. अंगणवाडी सेविकांचे मानधन वेळेत व नियमित मिळण्यासाठी, तसेच बँक खात्यात थेट जमा करण्यासाठीची प्रक्रिया पूर्ण झाली आहे. एक जुलैपासून राज्यातील अंगणवाडी सेविकांचे मानधन थेट बँकेत जमा होणार आहे, अशी माहिती या वेळी देण्यात आली.
केंद्र सरकारने प्रधानमंत्री सुरक्षित मातृत्व कार्यक्रमाची घोषणा केली आहे. मातृत्व अनुदान योजनेत, ज्या गर्भवती महिला कोणत्याही कारणांमुळे आपली प्रसूतिपूर्व तपासणी करू शकलेल्या नाहीत त्यांना अशा प्रकारच्या तपासण्या करण्याच्या अतिरिक्त संधी उपलब्ध करून देणे, कुपोषणग्रस्त महिलांच्या बाबतीत त्यांच्या आजारांचे लवकर निदान होण्याच्या दृष्टीने योग्य व्यवस्थापन करण्यावर विशेष भर देणे, किशोरवयीन व लवकर गर्भधारणा होणाऱ्या मुलींच्या बाबतीत त्यांना विशेष देखभालीची आवश्यकता असल्याने त्यांच्या गर्भधारणेच्या कालावधीमध्ये विशेष लक्ष देणे, गर्भधारणेच्या कालावधीत गर्भावस्थेमुळे उद्भवणारा रक्तदाब, मधुमेह, अशक्तपणा (ॲनिमिया) इत्यादी आजारांचे नियमित चाचण्या व तपासण्या करून उचित व्यवस्थापन करण्यात येणार आहे. ही योजना राज्यात राबविण्यासाठी प्रस्ताव मंत्रिमंडळाच्या बैठकीत मंजुरीसाठी ठेवण्यात येणार असल्याचे मुंडे यांनी सांगितले. या बैठकीत महिला व बालविकास विभागाचे सचिव विनिता वेद सिंगल, एकात्मिक बालविकास प्रकल्पाचे आयुक्त कमलाकर फंड आणि वरिष्ठ अधिकारी उपस्थित होते.
